Sığorta müqaviləsi bağlanan zaman diqqət edilməsi vacib olan məsələlər

Sığorta müqaviləsi bağlanan zaman aşağıdakılara diqqət etməyinizi məsləhət görürük:

1.        Sığorta etdirmək istədiyiniz əmlak mənafeyinizi konkret olaraq müəyyənləşdirin;

2.        Sığorta etdirmək istədiyiniz əmlak mənafeyi və Sizi maraqlandıran sığorta növü barədə sığorta şirkətinin nümayəndəsinə bildirin;

3.        Sığorta etdirmək istədiyiniz əmlak mənafeyi barədə sığorta şirkətinin nümayəndəsi tərəfindən Sizə verilən ərizə-anket formasında əks olunmuş suallara tam və dolğun cavab verin. Bundan başqa Sizə məlum olan və riskin baş verməsinə təsir edə bilən bütün məlumatları sığorta şirkətinin nümayəndəsinə bildirin;

4.        Sığorta şirkətinin nümayəndəsi tərəfindən riskin qiymətləndirilməsi baxımından mühüm əhəmiyyət kəsb edən məlumatlar ilə bağlı verilən suallara tam və dolğun cavab verin;

5.        Sığorta şəhadətnaməsi Sizə təqdim edildikdə, imzalamadan öncə onu və onun bütün əlavələrini, habelə onun ayrılmaz tərkib hissəsi olan sığorta qaydalarını tam oxuyun, sığorta şəhadətnaməsi üzrə təminat verilən risklərin, sığorta məbləğinin, azadolma məbləğinin, eləcə də şəhadətnamə üzrə Sizin hüquq və vəzifələrinizin nədən ibarət olduğunu öyrənin. Bunlarla bağlı sualınız yarandıqda, sığorta şirkətinin nümayəndəsindən Sizə qaranlıq qalan bütün müddəaları izah etməsini tələb edin;

6.        Sığorta haqqını sığorta şəhadətnaməsində göstərilən məbləğdə və müddətdə ödəyin.